എയർഹെൽപ്പ് സ്കോര്: ഖത്തർ എയർവേയ്സ് ഒന്നാം സ്ഥാനത്ത്, ഇത്തിഹാദ് രണ്ടാമത്
2025 ലെ എയർഹെൽപ്പ് സ്കോറിൽ ആഗോളതലത്തിൽ
ഖത്തർ എയർവേയ്സ് ഒന്നാം സ്ഥാനത്ത്.
10 ൽ 8.16 ഓവറോൾ സ്കോറോടെയാണ് നേട്ടം. കഴിഞ്ഞ വർഷം 8.11 സ്കോറോടെ രണ്ടാമതായിരുന്നു ഖത്തര് എയർലൈൻ.
ആഗോളതലത്തിൽ രണ്ടാം സ്ഥാനം നേടിയത് അബുദാബിയുടെ ഇത്തിഹാദ് എയർവേയ്സാണ്. 10 ൽ 8.07 ആണ് ഓവറോൾ സ്കോർ. ഒരു വർഷത്തിനിടെ ഒമ്പത് സ്ഥാനങ്ങൾ മെച്ചപ്പെടുത്തിയാണ് ഇത്തിഹാദിന്റെ രണ്ടാം സ്ഥാനത്തേക്കുള്ള കുതിപ്പ്. ഗൾഫിൽ നിന്നുള്ള ഒമാൻ എയർ ഏഴാം സ്ഥാനത്തുണ്ട്, 10 ൽ 7.82 ആണ് ഓവറോൾ സ്കോർ. കഴിഞ്ഞ വർഷം 7.22 സ്കോറുമായി 19-ാമതായിരുന്നു എയർലൈൻ.
2024 ഒക്ടോബർ ഒന്ന് മുതൽ 2025 സെപ്റ്റംബർ 30 വരെയുള്ള ഫ്ളൈറ്റ് ഡാറ്റയും 60-ലധികം രാജ്യങ്ങളിലായുള്ള 11,500-ലധികം യാത്രക്കാരിൽ നിന്നുള്ള സർവേയും അടിസ്ഥാനമാക്കിയാണ് 2025 ലെ ഫലങ്ങൾ. ലോകത്തിലെ മികച്ച എയർപോർട്ടുകളിൽ ദോഹ ഹമദ് എയർപോർട്ട് രണ്ടാമതുണ്ട്. 10 ൽ 8.52 ആണ് സ്കോർ. റിയാദ് കിങ് ഖാലിദ് എയർപോർട്ട് മൂന്നാമതാണ്. 10ൽ 8.47 ആണ് സ്കോർ. 8.47 സ്കോറുമായി മസ്കത്ത് എയർപോർട്ട് അഞ്ചാമതുണ്ട്. ലോകത്തിലെ ഏറ്റവും സമഗ്രവും വിശ്വസനീയവുമായ എയർലൈൻ റാങ്കിംഗുകളിൽ ഒന്നായി അംഗീകരിക്കപ്പെടുന്നതാണ് എയർഹെൽപ്പ് സ്കോർ. മൂന്ന് പ്രധാന കാര്യങ്ങളെ അടിസ്ഥാനമാക്കിയാണ് ഇതിൽ കാരിയറുകളെ വിലയിരുത്തുന്നത്. ഓൺ ടൈം പെർഫോമൻസ്, ഉപഭോക്തൃ അഭിപ്രായം, ക്ലെയിം പ്രോസസ്സിംഗ് എന്നിവയാണത്.
