ബലിപെരുന്നാൾ: വൈവിധ്യ ആഘോഷമൊരുക്കി ഷാർജ
അൽ ഖസ്ബ, അൽ മജാസ് വാട്ടർഫ്രണ്ട്, അൽ ഹീറ ബീച്ച്, മലീഹ നാഷണൽ പാർക്ക്, ഖോർഫക്കാൻ ബീച്ച് എന്നിവിടങ്ങളിലായി കുടുംബങ്ങൾക്കും കുട്ടികൾക്കും ഒരുപോലെ ആസ്വദിക്കാവുന്ന വിധത്തിലാണ് പരിപാടികൾ ക്രമീകരിച്ചിരിക്കുന്നത്.
പുസ്തകങ്ങളും സാംസ്കാരിക പ്രകടനങ്ങളും സജീവമാക്കുന്ന അൽ ഹീറ ബീച്ചിൽ 'ബുക്സ് ബൈ അൽ ഹീറ ബീച്ച്' എന്ന ചെറിയ പുസ്തകമേള അവധി ദിനങ്ങളിൽ നടക്കും. കടൽത്തീരത്തിൻ്റെ ശാന്തത ആസ്വദിച്ച് ചെറിയ വിലയിൽ (5 ദിർഹം മുതൽ) പുസ്തകം വാങ്ങാനും പരസ്പരം സൗജന്യമായി പുസ്തകങ്ങൾ കൈമാറാനും മേള അവസരമൊരുക്കും. കുട്ടികൾക്കായുള്ള കഥപറച്ചിൽ സെഷനുകളും എഴുത്തുകാരുമായി നേരിട്ടുള്ള സംവാദങ്ങളുമുണ്ടാവും. ഈദ് ദിനങ്ങളിൽ വൈകുന്നേരം 5മുതൽ 10മണി വരെയാണ് പരിപാടിയുടെ സമയക്രമം.
കൂടാതെ 'പ്രൗഡ് ഓഫ് യുഎഇ' എന്ന പ്രത്യേക പരിപാടിയുമുണ്ടാവും. ദേശസ്നേഹത്തിന്റെയും സാംസ്കാരിക വൈവിധ്യത്തിന്റെയും സന്ദേശങ്ങളിലൂടെ എല്ലാവരെയും ഒരുമിക്കുന്ന പരിപാടിയുടെ ഭാഗമായി പരമ്പരാഗത സംഗീത ബാൻഡിന്റെ പ്രകടനം, ഫെയിസ് പെയിന്റിങ്, വാൾ പെയിന്റിങ് എന്നിങ്ങനെയുള്ള കലാപരിപാടികളും അരങ്ങേറും. സന്ദർശകർക്കായി പ്രത്യേകം തയാറാക്കിയ ഇന്ററാക്ടീവ്360-ഡിഗ്രി ഫോട്ടോ ബൂത്ത്, ദേശീയതയും പെരുന്നാളിന്റെ സന്തോഷവും പങ്കുവയ്ക്കുന്ന യുഎഇ നാഷണൽ പ്രൈഡ് ഗ്യാലറി എന്നിവയും അൽ ഹീറ ബീച്ചിലുണ്ടാവും.
അൽ ഖസ്ബയിലെ നാടകപ്രദർശനം: ഷാർജ അൽ ഖസ്ബയിൽ മസ തീയറ്ററിലെ നാടകസീസൺ പെരുന്നാൾ അവധി ദിനങ്ങളിൽ ആരംഭിക്കും. ആധുനിക സജ്ജീകരണങ്ങളുള്ള, തത്സമയ നാടക പ്രദർശനങ്ങൾ ആസ്വദിക്കാനുള്ള അവസരമാണിത്. തമാശയും മാജികും കഥകളും പ്രേക്ഷകരുമായി നേരിട്ടുള്ള സംവേദനവുമെല്ലാമുള്ള 'മാജിക് ഫിൽ - യിങ് സില്ലി അറ്റ് സീ' എന്ന നാടകം മെയ് 27മുതൽ 30വരെ അരങ്ങേറും.
മലീഹ നാഷണൽ പാർക്കിൽ പ്രത്യേക പാക്കേജുകൾ, വാന നിരീക്ഷണവും മ്യൂസിയ പ്രവേശനവും കുട്ടികൾക്കായുള്ള പ്രത്യേക ശില്പശാലകളുമെല്ലാം സൗജന്യമായി അവതരിപ്പിക്കുന്ന പ്രത്യേക പാക്കേജുകളാണ് മലീഹ നാഷണൽ പാർക്കിലുള്ളത്. മലീഹ മരുഭൂമിയുടെ സൗന്ദര്യവും അറേബ്യൻ ആതിഥേയത്വവും വാനനിരീക്ഷണവുമെല്ലാം ഒരുമിച്ച് ആസ്വദിക്കാനാവുന്നതാണ് 'സമ്മർ ഫാമിലി ഫൺ' എന്ന പാക്കേജ്. പ്രത്യേകം തയാറാക്കിയ സൺസൈറ്റ് ലോഞ്ച് അനുഭവത്തോടൊപ്പം, 20മിനുറ്റ് വാനനിരീക്ഷണവും മലീഹ മ്യൂസിയത്തിലേക്കുള്ള പ്രവേശനവും സൗജന്യമാണ്. ആധുനിക ടെലിസ്കോപുകളുള്ള, പരിശീലനം ലഭിച്ച ഗൈഡുമാരുടെ നേതൃത്വത്തിൽ നടക്കുന്ന മലീഹയിലെ വാനനിരീക്ഷണ പരിപാടികൾ സഞ്ചാരികൾക്കിടയിൽ പ്രശസ്തമാണ്.
സാഹസികതയും പ്രകൃതി ദൃശ്യങ്ങളും സമ്മേളിക്കുന്നതാണ് 'റിഫ്രഷിങ് സൺസെറ്റ്' എന്ന പാക്കേജ്. മലീഹ മരുഭൂമികളിലൂടെയുള്ള 4X4കാറിലെ യാത്രയും, ഫോസിൽ - ക്യാമൽ റോക്കുകളിലെ സന്ദർശനവും തുടർന്ന് മരുഭൂമിയിൽ നിന്നുള്ള മനോഹരമായ അസ്തമയക്കാഴ്ചയും സന്ദർശകർക്ക് ആസ്വദിക്കാനാവും (പ്രവേശനം പാസിലൂടെ).
അൽഹീറ, ഖോർഫക്കാൻ ബീച്ചുകൾ കുട്ടികളെ ഉദ്വേഗഭരിതരാക്കുന്ന വിധം കളിസ്ഥലങ്ങളൊരുക്കുന്നതാണ് ഷാർജയിലെ പ്രധാന രണ്ട് ബീച്ചുകളിലെ പെരുന്നാൾ ആഘോഷത്തിന്റെ മറ്റൊരു സവിശേഷത. സാഹസികതയും വിനോദവും സമ്മേളിക്കുന്ന ഇവിടുത്തെ കളിയിടങ്ങൾ 'ലാൻഡ് ഓഫ് പൈററ്റ്സ്' (കടൽക്കൊള്ളകാരുടെ നാട്) എന്ന പ്രത്യേക തീമിലായിരിക്കും ഈ ദിനങ്ങളിൽ പ്രവർത്തിക്കുക. ട്രഷർ മാപ് ശില്പശാല,കരകൗശല സെഷനുകൾ, കുട്ടികളോട് നേരിട്ട് സംവദിക്കുന്ന ഗെയിമുകൾ, തത്സമയ പ്രദർശനങ്ങൾ എന്നിവയെല്ലാം ഈ മാസം 27തൊട്ട് 31വരെ അരങ്ങേറും. അൽ ഹീറ ബീച്ചിലെ ക്ലസ്റ്റർ2, ഖോർഫക്കാൻ ബീച്ചിലെ സദഫ് കിഡ്സ് ഏരിയ എന്നിവിടങ്ങളിലായിട്ടാവും കൂടുതൽ പരിപാടികളും.
Post a Comment
0 Comments