യുഎഇയിൽ നാളെ മുതൽ സ്‌കൂളുകൾ സാധാരണ നിലയിലേക്ക്: നേരിട്ടുള്ള അധ്യയനം പുനരാരംഭിക്കും

യുഎഇയിലെ എല്ലാ സർക്കാർ-സ്വകാര്യ സ്കൂളുകളിലും നഴ്‌സറികളിലും സർവ്വകലാശാലകളിലും നാളെ (2026 മെയ് 11, തിങ്കളാഴ്‌ച) മുതൽ നേരിട്ടുള്ള അധ്യയനം പുനരാരംഭിക്കുമെന്ന് വിദ്യാഭ്യാസ മന്ത്രാലയം അറിയിച്ചു. മേഖലയിലെ സുരക്ഷാ സാഹചര്യങ്ങൾ പരിഗണിച്ച് കഴിഞ്ഞ ചൊവ്വാഴ്‌ച (മെയ് 5) മുതൽ മുൻകരുതൽ നടപടിയായി ഏർപ്പെടുത്തിയിരുന്ന ഓൺലൈൻ പഠന രീതിക്കാണ് ഇതോടെ മാറ്റമുണ്ടാകുന്നത്.

സുരക്ഷാ മാനദണ്ഡങ്ങൾ കർശനമായി പാലിച്ചുകൊണ്ടായിരിക്കും വിദ്യാലയങ്ങളുടെ പ്രവർത്തനം. വിദ്യാർത്ഥികളുടെയും അധ്യാപകരുടെയും സുരക്ഷ ഉറപ്പാക്കാൻ ബന്ധപ്പെട്ട അധികൃതരുമായി ചേർന്ന് മന്ത്രാലയം സ്ഥിതിഗതികൾ വിലയിരുത്തി വരികയാണ്. വിദ്യാലയങ്ങൾ തുറക്കുന്നതോടെ രാജ്യം സാധാരണ നിലയിലേക്ക് മടങ്ങുന്നതിൻ്റെ ഭാഗമായി അക്കാദമിക് കലണ്ടറിലെ പരീക്ഷകളും മറ്റ് മൂല്യനിർണ്ണയങ്ങളും തടസ്സമില്ലാതെ തുടരാൻ സാധിക്കും.