ദുബൈ റൈഡ് ഞായറാഴ്ച സൈക്കിളുകൾ സൗജന്യം

ദുബൈ റൈഡ് ഞായറാഴ്ച 

സൈക്കിളുകൾ സൗജന്യം

ദുബൈ: ഒരു മാസം നീണ്ടു നിൽക്കുന്ന ദുബൈ ഫിറ്റ്നസ് ചലഞ്ചിൻ്റെ ഭാഗമായി ഞായറാഴ്ച നടക്കുന്ന ദുബൈ റൈഡിൽ പങ്കെടുക്കുന്നവർക്ക് ഇത്തവണയും സൗജന്യമായി സൈക്കിൾ നൽകുന്നു. ദുബൈ റോഡ് ഗതാഗത അതോറിറ്റിയുമായി കൈകോർത്ത് പ്രമുഖ ഡെലിവറി സേവന ദാതാക്കളായ കരീമാണ് സൈക്കിൾ നൽകുക. കരീം ആപ്ലിക്കേഷനിൽ DR25 എന്ന പ്രമോ കോഡ് ഉപയോഗിച്ച് കരീം ബൈക്ക് സ്റ്റേഷനുകളിൽ നിന്ന് സൈക്കിളുകൾ സ്വന്തമാക്കാം.

ഫ്യൂച്ചർ മ്യൂസിയത്തിലെ ( ട്രേഡ് സെന്റർ സ്ട്രീറ്റ്) 'A' പ്രവേശന കവാടത്തിലും ലോവർ എഫ്.സി.എസ് (ഫിനാൻഷ്യൽ സെൻട്രൽ സ്ട്രീറ്റ്) 'E' പ്രവേശന കവാടത്തിലും സൈക്കിൾ ലഭിക്കും. കൂടാതെ ദുബൈയുടെ വിവിധ ഭാഗങ്ങളിലെ 200ൽ അധികം കരീം ബൈക്ക് സ്റ്റേഷനുകളിൽ നിന്നും സൈക്കിളുകൾ എടുക്കാം.

നവംബർ 2 ദുബായ് റൈഡ് ദിവസം പുലർച്ചെ 3 മണി മുതൽ രാവിലെ 8 മണി വരെ ആദ്യം വരുന്നവർക്ക് ആദ്യം എന്ന രീതിയിൽ ബൈക്കുകൾ ലഭ്യമാകും.