കരുത്തു തെളിയിക്കും ഒമാന് ദേശീയ ദിനാഘോഷം
ഒമാൻ ദേശീയ ദിനാഘോഷങ്ങളുടെ ഭാഗമായി നടക്കുന്ന ചടങ്ങുകൾക്ക് സുൽത്താന് ഹൈതം ബിൻ താരിഖ് നേതൃത്വം നല്കും. നാളെ വ്യാഴാഴ്ച മസ്കത്തിലെ അൽ ഫത്ഹ് സ്ക്വയറിൽ വെച്ച് നടക്കുന്ന ഗംഭീര സൈനിക പരേഡോടു കൂടിയാണ് ദേശീയ ദിനാഘോഷങ്ങൾക്ക് തുടക്കമാവുക.
നവംബർ 21 വെള്ളിയാഴ്ച വൈകിട്ട് ഖുറം ബീച്ചിൽ നടക്കുന്ന റോയൽ നേവി ഓഫ് ഒമാൻ ഫ്ലീറ്റിന്റെ മനോഹരമായ നാവികസേനാ റിവ്യൂവിനും സുൽത്താൻ ഹൈതം ബിൻ താരിഖ് നേതൃത്വം നൽകും. ഈ വർഷത്തെ വിപുലമായ ദേശീയദിന പരിപാടികളുടെ ഭാഗമായാണ് ഇരു ചടങ്ങുകളും സംഘടിപ്പിച്ചിക്കുന്നത്.
സൈനിക സ്ഥാപനങ്ങളോടുള്ള അഭിമാനവും സേവനത്തിന്റെയും ദേശീയ ഐക്യത്തിൻ്റെയും പാരമ്പര്യവും പ്രതിഫലിപ്പിക്കുന്നതാണ് ചടങ്ങുകൾ. സുൽത്താൻ ഹൈതം ബിൻ താരിഖിൻ്റെ നേതൃത്വത്തിൽ ഒമാൻ കൈവരിച്ച പുരോഗതിയെ ആദരിക്കുന്നതിനായുള്ള ഔദ്യോഗിക ചടങ്ങുകളും പരിപാടിയുടെ ഭാഗമാകും. ഉന്നത സൈനിക ഉദ്യോഗസ്ഥരും രാജകുടുംബാംഗങ്ങളും ചടങ്ങിൽ പങ്കെടുക്കുമെന്നാണ് പ്രതീക്ഷിക്കുന്നത്.
