നാലാമനും ഞെട്ടറ്റു..
മലയാളി കുടുംബത്തിലെ മൂന്ന് കുട്ടികൾ മരണപ്പെട്ട അബുദാബി അപകടത്തിലെ ചികില്സയിലായിരുന്ന നാലാമത്തെ കുട്ടിയും മരിച്ചു. അപകടത്തിൽ സാരമായി പരിക്കേറ്റിരുന്ന ഏഴ് വയസ്സുകാരൻ അസം ആണ് ഇന്നലെ മരിച്ചത്. ഇവരുടെ ഹൗസ് മെയ്ഡ് ഉൾപ്പെടെ മരണസംഖ്യ അഞ്ചായി. മലപ്പുറം കൊണ്ടോട്ടി സ്വദേശി അബ്ദുൽ ലത്തീഫിന്റെയും റുക്സാനയുടെയും മൂന്ന് മക്കളാണ് അപകട ദിവസം മരിച്ചത്. അബ്ദുൽലത്തീഫിനെയും റുക്സാനയെയും മറ്റു രണ്ട് മക്കളെയും സാരമായി പരിക്കുകളോടെ അബുദാബി ഷഖ്ബൂത്ത് ആശുപത്രിയിൽ പ്രവേശിപ്പിച്ചിരുന്നു. അബുദാബി ലിവ ഫെസ്റ്റിവൽ കണ്ട് മടങ്ങുന്നതിനിടെ അബുദാബി-ദുബൈ റോഡിൽ ഞായറാഴ്ച രാവിലെ കുടുംബം സഞ്ചരിച്ചിരുന്ന കാർ നിയന്ത്രണം വിട്ട് മറിയുകയായിരുന്നു. അപകടത്തിൽ ഹൗസ് മെയ്ഡ് ബുഷറയും മരണപ്പെട്ടിരുന്നു.
പ്രവാസ ലോകത്തെ ഏറെ ദു:ഖത്തിലാഴ്ത്തിയ ദുരന്തമാണ് ഞായറാഴ്ച അബുദാബിയിലുണ്ടായത്. അബ്ദുലത്തീഫും. റുക്സാനയും മകൻ പത്ത് വയസ്സുകാരൻ ഇസ്സയും ആശുപത്രിയിൽ തീവ്രപരിചരണ വിഭാഗത്തിൽ ചികിത്സയിലാണ്.
