പരിക്കേറ്റിട്ടും യാത്രക്കാരെ രക്ഷിച്ചു; പൈലറ്റ് സ്മിത് മച്ഛറിനെ 'ഹീറോ' എന്ന് വിശേഷിപ്പിച്ച് മോദി

ഫ്ലൈദുബായ് വിമാനത്തിൽ സഹപൈലറ്റിന്റെ മാരകമായ ആക്രമണം നേരിട്ടിട്ടും, 174 യാത്രക്കാരുടെ ജീവൻ രക്ഷിച്ച ഇന്ത്യൻ പൈലറ്റ് ക്യാപ്റ്റൻ സ്മിത് മച്ഛാറിനെ പ്രധാനമന്ത്രി നരേന്ദ്ര മോദി 'യഥാർത്ഥ ഹീറോ' എന്ന് വിശേഷിപ്പിച്ചു. ഒക്ടോബർ 1-ന് സോഷ്യൽ മീഡിയ പ്ലാറ്റ്‌ഫോമായ X-ലൂടെയാണ് പ്രധാനമന്ത്രി പൈലറ്റിന്റെ അസാമാന്യ ധീരതയെ പ്രശംസിച്ചത്.

'ഏറ്റവും വലിയ അപകടം മുന്നിൽ വന്നിട്ടും, ഗുരുതരമായി പരിക്കേറ്റിട്ടും മറ്റുള്ളവരുടെ ജീവൻ രക്ഷിക്കാൻ ക്യാപ്റ്റൻ സ്മിത് മച്ഛാർ കാണിച്ച അപാരമായ ധൈര്യവും നിശ്ചയദാർഢ്യവും പ്രശംസനീയമാണ്. അദ്ദേഹത്തിന്റെ വീരത്വം നൂറുകണക്കിന് ജീവനുകൾ രക്ഷിക്കാനും വലിയൊരു ദുരന്തം ഒഴിവാക്കാനും സഹായിച്ചു. ഇന്ത്യ ക്യാപ്റ്റൻ മച്ഛാറിനെ ഓർത്ത് അഭിമാനിക്കുന്നു, അദ്ദേഹം വേഗത്തിൽ സുഖം പ്രാപിക്കട്ടെയെന്നും' പ്രധാനമന്ത്രി ആശംസിച്ചു.

ഇന്നലെ ദുബൈയിൽ നിന്ന് ഇസ്രയേലിലെ ടെൽ അവീവിലേക്ക് പറക്കുകയായിരുന്ന ഫ്ലൈ ദുബൈ FZ1073 (ബോയിങ് 737 മാക്സ് 8) വിമാനത്തിന്റെ കോക്പിറ്റിൽ വെച്ചാണ് സംഭവം നടന്നത്. ഒമാൻ സ്വദേശിയായ സഹപൈലറ്റ് ക്യാപ്റ്റൻ സ്മിത്തിനെ കത്തികൊണ്ട് കുത്തിപ്പരിക്കേൽപ്പിക്കുകയും വിമാനം തകർക്കാൻ ശ്രമിക്കുകയുമായിരുന്നു.

കുത്തേറ്റതിനെ തുടർന്ന് രക്തത്തിൽ കുളിച്ച നിലയിലായിരുന്നിട്ടും തളരാതെ പോരാടിയ സ്മിത് മച്ഛാർ കോക്പിറ്റിന്റെ വാതിൽ തുറന്ന് നൽകുകയും, തുടർന്ന് വിമാനത്തിലുണ്ടായിരുന്ന ജീവനക്കാരും യാത്രക്കാരും ചേർന്ന് അക്രമിയെ കീഴ്‌പ്പെടുത്തുകയുമായിരുന്നു.

ആക്രമണത്തെ തുടർന്ന് വിമാനം സൗദി അറേബ്യയിലെ തബൂക്കിലേക്ക് തിരിച്ചുവിടുകയും അവിടെ സുരക്ഷിതമായി അടിയന്തര ലാൻഡിങ് നടത്തുകയും ചെയ്തു. പരിക്കേറ്റ സ്മിത്തിനെ സൗദിയിലെ ആശുപത്രിയിൽ ശസ്ത്രക്രിയയ്ക്ക് വിധേയനാക്കി. മുംബൈ ഘാട്കോപ്പർ സ്വദേശിയായ ഇദ്ദേഹത്തിന് വാണിജ്യ വിമാനങ്ങൾ പറത്തുന്നതിൽ 13 വർഷത്തിലധികം പരിചയസമ്പത്തുണ്ട്. മുൻപ് സ്പൈസ്ജെറ്റിൽ സേവനമനുഷ്ഠിച്ചിരുന്നു. 2022 ജൂണിലാണ് ഫ്ലൈദുബായിൽ ചേർന്നത്. പ്രധാനമന്ത്രി നരേന്ദ്ര മോദിക്ക് പുറമെ ഇസ്രയേൽ പ്രധാനമന്ത്രി ബെഞ്ചമിൻ നെതന്യാഹുവും യു.എസ് പ്രസിഡന്റ് ഡൊണാൾഡ് ട്രംപും ക്യാപ്റ്റൻ സ്മിത് മച്ഛാറിനെ 'ഹീറോ' എന്ന് വിശേഷിപ്പിക്കുകയും അദ്ദേഹത്തിന്റെ ധീരതയെ അഭിനന്ദിക്കുകയും ചെയ്തു.